أحمد عبد العليم يكتب: المُتَهَم

أحمد عبد العليم يكتب: المُتَهَم


الأربعاء، 1 ديسمبر 2010 - 08:44
[ندعوك للتسجيل في المنتدى أو التعريف بنفسك لمعاينة هذا الرابط]
المتهم.. أنا
مُتهم بالانتماء
القاضى شاف ده.. غباء
ومن غير كلام
بسرعة أعلن الأحكام
وقال: نصبت
وإنى سرقت.. واغتصبت
المهم.. اتشنقت
وحضرت مشهد الإعدام
وقال فـ لايحة الاتهام
إنى نصبت
أيوة نصبت !
نصبت.. المشانق
للى كان على روحى خانق
اللى موِّت الأحلام صبيِّة
جوه فيّا
وبداعى.. أمن البلد
رفعوا فوق رءوسنا البنادق
وشربّونا.. الخوف
وخوّفونا.. نشوف
وإن شوفنا.. لابد ندّارى فـ خنادق
ومبقتش عارف
إن كانت كدّاب.. ولاّ صادق
المهم.. اتشنقت

قال: سرقت
أيوة سرقت !
سرقت الحزن فـ عيون الغلابة
وخطفت منهم لحظة يأس
وكاااام ضحكة
من غير نِفس
وكام شمس.. بتنوّر
تجيب ضلمة
وناس ظالمة
بتبيع الأمل.. أوهام
سرقت.. كل لحظة وهم
القاضى قال: قِلة فهم

متهم إنى اغتصبت
أيوة اغتصبت !
اغتصبت.. الظُلم
لأجل يحبَل مِنّى فكرة
تبقى كلمة حق.. بُكره
لأجل يرجع النهار
يبقى عِلم
مش خيال.. عيال.. صغار
آآآآه أموت
بس أعيش فى كل صوت
عاش وقال للظلم لأ
مات عشان.. كلمة حق
الموت هنا.. معنى الحياة
والفكرة.. حرية
وطنها فوق فـ السما
وأنا متهم
والقاضى قال: محكمة!!