د. إيهاب عبده يكتب: صباح الفل يا بلدى

د. إيهاب عبده يكتب: صباح الفل يا بلدى


الثلاثاء، 30 نوفمبر 2010 - 14:56
[ندعوك للتسجيل في المنتدى أو التعريف بنفسك لمعاينة هذا الرابط]
يا مصر يا أذكى من العنبر
يا مصر نهارك وليلك
فى قلبى طعمهم سكر
صباح الفل يا بلدى
بنيلك اللى متمختر
وشعب فى كل يوم حبك
محبة بالسنين تكتر
ورغم العيشة تعبانة
وقوت اليوم مخاصمنا
بصبح كل يوم بيكى
ونفسى رضاكى مش أكتر
سألنى الكل يا بلدى
وأنا ماشى كدة مزمجر
فى وسط الحر والزحمة
وكل مشاكلك الأخطر
تعيشها ليه ودى بتأسى
على ولادها كبير وأصغر
أجاوب من صميم قلبى
دا سحر فى قلبى سره بسيط
دا لما السنين تقسى
منايا شايى والسكر!!
سيجارة يوم تلهينى
بكاسة شاى تمنينى
وأنسى جوة الاتنين
مساخة عيشتى وأتشطر
وبقرا جريدتى كالعادة
فى يومى السابع الأشطر
وعينى خايفة من الأخبار
وبادعى يا كريم استر
يوقولوا سجايرى دى غليت
وهادفع أغلى للسكر!!
وبطرس بيه دبح شايى
لا نستورد ولا نصدر
يا مصر قوليلى على فكرة
تثبت دينى ولا أكفر
إذا ما الذل عاجبنى
ولجل الشاى بقول أكتر!!
وأصحى اليوم والاقينى
بلا أخضر ولا أحمر!
سألتك والسؤال لله
تدلينى على فكرة
أصبح بيها يا بلدى
عليكى تانى بالعنبر؟؟؟؟