أحمد عبد العزيز يكتب: بحبك...

أحمد عبد العزيز يكتب: بحبك...



الثلاثاء، 28 ديسمبر 2010 - 08:58









[ندعوك للتسجيل في المنتدى أو التعريف بنفسك لمعاينة هذا الرابط]




بحبك مهما قال الكل
بإن الحِسبه دى بِرمه
وعُمْر الحرف والكلمه
ما تشفى حاله ميئوسه
وكدبوا لما قالوا كتير
بإن البوصه لو لبست
هتبقى حلوه يا عروسة
واحبك مهما جِهدى قل
وصار اللغز فيكى كبير
وصار معقود وماله حل

واحبك
وبحلف إن فى حبك
سعاده وخير
وحضنك زى حضن براح
عليه برتاح
وارفرف زى باقى الطير

واحبك
ومن حبك ما بطلب شئ
بحاول إنى أوهبلك بحبى شئ
وخايف أصل جلادك مايعرف شئ
وهدفه إن فى التوهه هننسى نحب
نعيش ونموت ونمحى القلب
نحرّم إننا نحبك
نحرّم إننا نودك
منفهمشى عشانك شىء

بحبك....
وأنا فى الحب عالى رفيع
بكون معجون فى أحوالك
وألاقى الهم فيكى يضيع
ولكن أكره اللى يبيع
وبكره كل من هانك
وكان فاسد وطبعه وضيع
وجنّد كل حراسك
على العشاق، على العلماء
على العواجيز
على اللى انتى لهم عكاكيز
على كل اللى حبوكي
على طفلك وهو رضيع
على مُلاك أراضيكي
لحد ما يجمع المقاطيع
لحد ما ينتهى م البيع

بحبك...
وأحب كتير أشيل عَلَمِك
وارفرف بعد فوز غالي
فى ماتشات كوره أو سله
ورغم الهيبه ما بخجل
اقوم ارقص فى أفراحك
واطبل ع الطشوط فى البيت
ويمكن حتى ع الحلّه
وبتعجب ساعات واسأل
ولا مرة قابلت فى وسط أفراحك
ولا حتى فى وسط الهم وجراحك
ولا حاكم ولا مسئول
يادوبك ألمحه بالكاد
يا بيهنى.. يا بيعزي
فى موجز أو شريط أخبار
وحتى لو بشوف وشه
بلاقى فيه خطوط إصرار
تتوهنى وأتوه فيها
واتوه أكتر فى حالة إنه هيوضح
دلائل حزنه أو فرحه
فى كلمة أو فى وسط حوار
معادله كلها مجاهيل
مفيش مُعطى
مفيش برهان
وناتجها فى يوم هيكون
مواطن، بس مش غلبان
يمر بإنقسام مقهور
مع التعذيب
مع التخريب
ونرفع درجة الإذلال
لحد ما توصل الغليان
يثور ويثور
لحد ما يتولد إنسان
يحب بلا قيود فى النور
ويعلن نوبة العصيان
ويتحرر من السجان