هيثم عبد الشافى يكتب: (اسم وأربع عيال)

هيثم عبد الشافى يكتب: (اسم وأربع عيال)


الخميس، 18 نوفمبر 2010 - 09:36
[ندعوك للتسجيل في المنتدى أو التعريف بنفسك لمعاينة هذا الرابط]
المسافة....
ما بين صوابعكِ وملامحى
حاجه عَبطَ
بس أنا من بلد
وأنتِ من ألف بلد
المسافة....
ما بينى وبينكِ أشتكت
أنا من بلد وأنتِ من ألف بلد
إزاى بقى بطرف صابعكِ تحننى الشفايف؟!
إزاى تكونى فـ وشى وأكون مش شايف
خايف وميت ألف خايف
إشمعنى للطير ولايف
إشمعنى وصلكِ يغربنى
ليه الليل إن شافنى معاكِ يتف فـ وشى؟!
شى يبكى...
حداشر سنه تعمليلى الشاى
يطلع ماسخ لا طعم لا لون
ليه مش شايفنى فـ إيدكِ خيط بالون؟!
ليه وليه عـلى بركِ رسينا
طب ان ما كنتِ تبوحى مين يحاكينا؟!
غربنى وصلكِ
ويا ريتها بس المسافات
انا مت فـ سريركِ كل الموتات
اللى ما بين حضنى وحضنكِ
مطرح للريح يبات
لا بليت قلبى بحرف ناعم
ولا عينكِ فــــــ عينى
مسحت على رأس السؤال
ليه كل اللى ما بينى وبينكِ
اسم وأربع عيال.