شاعر العاطفة محمد السعيد وقصيدة ياريتنا ماعملنا ثورة

السبت نوفمبر 30, 2013 5:39 pm

ياريتنا ماعملنا ثورة

كنا عايشين وراضيين وأهى عيشة والسلام .
بنام ونقوم على نفس الحال ونفس الكلام .
والأيام بتعدى وبتروح .
والقلب من كتر الهموم مجروح .
والحق مهما يتقال دايماً مدبوح .
ده فيه ناس عايشة فوق السطوح .
وناس ساكنة فى قصور .
بتدور بس ع المال والماس والبنور .
وناس مش لاقية حتى مية ولا نور .
وتقف بالساعات فى الطابور .
كان فيه أمن وأمان مش هننكر .
وضرب فى الأقسام وكرامة بتتهان والملح كان أغلى م السكر .
أمن الدولة ياأمن الدولة .
كنت لممنا بدون محاولة .
كنا بنخاف نتكلم فى السياسة .
ما اللى قال السياسة نجاسة كان معلم .
كان اللى يصلى ويقول رئاسة .
يتاخد فوراً بدون ما يتكلم .
كنا عايشين وراضيين وخلاص .
بحلوها بمرها بخيرها بشرها أهى عيشة ياناس .
والسلطة إبتدت تقوى وتظلم وتحتقر البلد .
لا فارق معاها غنى ولا فقير ولا بنت ولا ولد .
والناس إبتدت تفوق وقررت تعمل الصح .
فكرت فى ثورة شعبية تقول للسلطة بح .
وعملنا ثورة 25 يناير .
فرحنا بيها وبقى الكل طاير حاير .
قلنا عاوزين نجرب الحرية .
عاوزين التغيير فى كل حاجة ونبقى دولة مية مية .
نزلنا وقلنا عيش حرية عدالة إجتماعية .
وشهدا ونشطا وثوار .
وده مخرب وده ثورجى وده فلول وده فى النار .
إرحل إرحل مش عايزينك .
إرحل بقى كده ينصر دينك .
ومشى مبارك .
فى 18 يوم رحل مبارك .
سابها وقال أنا أو الفوضى .
عادى كلام بيقوله عشان الناس دى ترضى .
بس فعلا بدأت الفوضى .
وتركنا الميدان .
وبقينا فى حيرة وتوهان .
وكله بيضرب فى كله مهى فوضى فى المليان .
مجلس عسكرى مسك البلاد .
إعلان دستورى فى مارس ونعم إجبارى ياولاد .
ومفيش حاجة إتغيرت .
كل حاجة زى ماهيا إتثبتت .
وفوضى ومظاهرات .
وشهدا كل يوم مسلم و مسيحى وبيتسجلوا فى الوفيات .
ربنا يرحم كل الشهدا من شعب وجنود وشرطة ده فيه حكايات .
من كنيسة القديسين وجمعة الغضب وموقعة الجمل وتفجير خط الغاز من قبل محتالون .
لدير الأنبا بيشوى وكنيسة صول وكشوف العذرية وأحداث المقطم والبالون .
من محاكمة مبارك لأحداث إمبابة وكنيسة الماريناب ومجزرة ماسبيرو وتبادل الأسرى وأحداث محمد محمود ومجلس الوزراء والبارون .
كل يوم شهدا بتموت .
وكل يوم الشعب بينقص منه كتكوت .
وبدأنا إنتخابات مجلس الشعب .
والإخوان والنور سيطروا على كل الشعب .
وأخدوا المجلس شعب وشورى .
وبقى هما الأصل وإحنا الصورة .
وشهدا ستاد بورسعيد .
جماهير بريئة تموت عشان خاطر العبيد .
فى الإستاد بيقولوا أهلى .
وبعد المتش جثث بتندهلى .
وتقولى فين حقى ولا هتنسونى زى بقيت زمايلى .
إنتخابات رئاسة ومرشحين ساسة.
وإستبعاد خيرت وحازم وإنسحاب البرادعى والإخوان داخلة بشراسة .
ومن أحداث العباسية للحكم على مبارك لحل البرلمان لفوز مرسى بالرئاسة .
محمد مرسى بقى رئيس مصر وتبت فى الحكم .
قالوا النهضة مفيش نهضة والإرشاد بقى ماسك الحكم .
شهدا مجزرة رفح وقت الفطار .
عساكر غلابة بتفطر وجه الإرهاب موتهم بدون أعذار .
طبعاً مدبرة عشان الجيش يبقى فى إنكسار .
أطفال بريئة شهدا قطر أسيوط .
رايحة مدرستها بأتوبيس والقطر عدى عليهم موت .
وعملنا حداد وبروفايل أسود وزعلنا يومين وكله بيفوت .
أحداث محمد محمود من تانى .
وشهدا من غير ذنب عشان الذكرى الأولى مش عجبانى .
وإعلان دستورى إجبارى .
واللى مش عاجبه أهلى وعشيرتى أهم دارى .
وظلم وإفترى ومليشيات إخوان فى المدن والحوارى .
وكانت موقعة الإتحادية الشهيرة .
وشهدا من تانى مهى مش هتبطل دى السيرة .
الإخوان فى الحكم واللى هيتكلم هيشوف المغيرة .
وعملوا دستور مسلوق على مزاجهم .
وبرضه نعم إجبارى وإذا كان عاجبكم .
وقالت الصناديق للدستور نعم .
واللى يقول لا هيخش النار ده دستور نغم .
كل شوية خطاب لمرسى ملوش معنى .
بس بصراحة كان فى البيت بيجمعنا .
بنضحك ونتسلى وباسم كل يوم بيمتعنا .
كل يوم شهدا بريئة بتموت مننا .
والإخوان مش حاسين بينا عشان مش زينا .
ولا حد سائل ولا معبر ولا مهتم .
كله فى السلطة نايم والأهل والعشيرة أهم .
من أحداث الاتحادية تانى لمكتب الإرشاد والعباسية وسد أثيوبيا .
مفيش سولار ولا كهربا والبلد حالها واقف وكله دايس فى اللوبية .
دى مش حرية ولا عدالة دى بلد الناس المفترية .
قلنا مفيش إلا حل واحد هوا التمرد .
ونزلنا فى 30 يونيو نطالب برحيل مرسى بدون تردد .
أيوه فى 4 أيام رحل مرسى .
بعد سنة عذاب وذل فضينا الكرسى .
وإعتصم الأهل والعشيرة فى النهضة ورابعة .
وقالوا معانا شرعية وده إنقلاب ياعالم دى سمعة .
والسيسى قال دى مصر أم الدنيا وهتبقى قد الدنيا ونور عنيا .
وبدأ القتل والإرهاب .
فى كل مكان بنت أو شاب .
من أحداث الحرس الجمهورى والمنصة للتفويض ضد الإرهاب .
وفض رابعة والنهضة ونهب وتخريب وقتل وشهدا فى كل الشباب .
لأحداث كرداسة ودلجا وشهداء رفح تانى وتالت ومن غير أسباب .
وشهدا من الجيش والشرطة كل شوية .
طلاب جامعة وأطفال وسجون مليانة وبكمية .
مظاهرات تطالب بالشرعية .
وجامعات بقت مقر للتكية والداخلية .
والبلد حالها واقف وفى النازل وبتموت .
عشان كله عاوز مصلحته وبينادى بعلو الصوت .
ياريتنا ما عملنا ثورة وياريت اللى جرى ما كان .
ياريتنا ما قلنا حرية ولا فكرنا حتى فيها من زمان .
إحنا شعب مينفعش معاه اللى الكرباج .
بقينا مليون حزب وفئة ورأى وتفكير ونعاج .
ده فلول ويسارى وليبرالى .
وده إخوان وسلفى وعلمانى .
وأنا الشعب الغلبان اللى بموت وبطحن ومش لاقى لقمة العيش .
يلعن أبو الحرية اللى فكرنا فيها .
خلتنا شعب بيقتل بعضه عليها .
وفى الآخر يقولك مفيش . كبر وعيش . مشيها تطنيش .
ياريت نرجع نحب بعض ونتسامح .
وننسى الخلاف اللى بنا ونتصالح .
ونفكر فى بلدنا ونغير من جوانا .
نصفى قلوبنا ونتحد دى مصر أمانة .
يابلدى ياحرة ياأم الدنيا .
ليكى رب يحميكى من شر الدنيا .

كلمات / شاعر العاطفة محمد السعيد .

السبت أكتوبر 12, 2019 11:17 am

تسلم ايديك ياشاعر ياكبير

شاعر العاطفة محمد السعيد وقصيدة ياريتنا ماعملنا ثورة

شاعر العاطفة محمد السعيد وقصيدة ياريتنا ماعملنا ثورة

رد: شاعر العاطفة محمد السعيد وقصيدة ياريتنا ماعملنا ثورة