حسن العربى يكتب: مش حانسأل إنتو مين

حسن العربى يكتب: مش حانسأل إنتو مين



الخميس، 6 يناير 2011 - 09:40









[ندعوك للتسجيل في المنتدى أو التعريف بنفسك لمعاينة هذا الرابط]




إنتو مين؟ ؟
إحنا مش صيدكو السِمين
إللى ينجَّـر لكمين
إحنا أجناس طيبين * * وإنتو مين ؟

الأكيد مالكوش ديانة أو هوية
إنتو إيد شيطان بِجِح بعيون قوية
أو عبيد للشر لابسين مجرمين
أو لإبليس خدامين * * إنتو مين؟

إنتو أعداء السلام * * إللى زى الشوك فى زورنا؟
هىَّ روح الانتقام * * لسة بتحِـش ف جذورنا؟
طب قولولى دفعتوا كام * * للجواعا المعدمين؟
احلفوا ع المية تجمد * * كدابين
لو ما كانش بنيامين * * يبقى مين؟

إنتو وَهـم؟ والأذية مِنَّا فـينا؟
يبقى هَم تقيل ولا هِـلب السفينة
و الأهم * * إنتو فيكو عقول سجينة
واللا أمخاخ مغسولين؟ إنتو أعداء الصليب؟
إنتو ضد المسلمين؟ واللا مين؟

هوَّ تقصير مننا؟ * * ظٌلم واترعرع هنا؟
آه يا نبحة حِسِّنا * * اعدلوا فى المحكومين
لو حاهاتى ميت سنة * * تسمعوا متبسمين
إحنا فيكو مصدومين * * إنتو مين؟

إنتو عين للأمن مش مفروض تنام؟
همَّها فى الدنيا تأمين النظام
أو ضيوف الشيخ حصيرة * * أو سفارة العم سام
تحسبوا الأنفاس علينا و الكلام * * هددونا من يومين
يقتلونا وإحنا قاعدين آمنين * * كنتوا فين؟

إنتو فكر وسوس ينَخوَّر * * وف كلام الله يحوَّر
يوم يكَـفَّر يوم يزوَّر * * عالشهادة مصممين؟
بالإيمان متلصمين؟ لو تدوَّر عن إله العالمين
إحنا أول من سجد له وقال آمين * * وإنتو مين ؟

كل مرة الهوجة تهدا والوداد
نرسمه بالعافية على وش العباد
والإمام يحضن أبونا فى الحداد
ده بيشجب ده أشاد * * وإحنا قاعدين مكتومين
وإنتو نار تحت الرماد * * بالسواد متلسمين
إنتو مين واللا مين؟

إنتو مين واللا مين * * واللا يمكن كل دول
مش حاضيع وقتى فيكو * * مش حاقول
غير كلام شرحه يطول
مش حاعزى بالطبول * * إحنا أهل المكلومين

صحصحوا مِدوا الأيادى مِـدَّها
أى ثغرة للأعادى نسدها
أى أسوار بين ولادى نِهِدَّها

أو عقول نسييت بلادى نرُدها
نبقى طاقة أى ضربة نصُدها
ليه نكون متقسمين
أوعدونى نحبها واحلفولى نودها
احلفولى ميت يمين
وفروا الوقت الثمين * * للى يسأل هُمَّا مين