سيد أحمد الهمشرى يكتب: ضحك ليه علينا الشيطان

سيد أحمد الهمشرى يكتب: ضحك ليه علينا الشيطان



الجمعة، 7 يناير 2011 - 08:49









[ندعوك للتسجيل في المنتدى أو التعريف بنفسك لمعاينة هذا الرابط]




أخويا يا بطرس يا حنا يا غالــــــى يا يوسف يا عيسى يا أبو المجد عالى
أخويا يا أمجد يا عبد المسيـــــــــح يا وليم يا مينا يا مرقص يا والـــــــى
أخويا يا كل اللى مؤمن بعيســــــى وموسى ومحمد يا مصرى يا غالــى
تعالوا نسامح وننسى جراحنــــــــا تعالوا ننور سواد الليالـــــــــــــــــــى
تعالوا نقرب من الإنسانيـــــــــــــة وقلبى وقلوبكم من الحقد خالـــــــــــى
تعالوا نمهد جسور المــــــــــــــودة ونور المحبة فى طريقنا يلالـــــــــى
وقولوا لمدلين وماريا واليــــــــــس وقولوا لمريم بنورك تعالــــــــــــــــى
وحطوا أيديكم على ايدين خديجــــة واشوف المحبة اللى عايشه فى خيالى
...
إخواتى يا أقباط يا نور العنيــــــــــن يا غاليين حقيقى على المسلميـــــــــن
صلاتى وصلاتكم بتكمل بعيســــــى وعيسى ومحمد من المرسليـــــــــــن
ومريم تجلت فى آية كريمـــــــــــــة فى قران منزل وبيه مؤمنيـــــــــــــن
وبينى وبينكم مودة وأخـــــــــــــــوة واحنا لمصر الحبيبة جناحيــــــــــــن
تعالوا نزيح الشيطان من قلوبنـــــــا وننسى الوساوس فى دنيا وديـــــــــن
تعالوا معايا نوحد صفوفنـــــــــــــــا ونبعد بروحنا عن المجرميــــــــــــن
تعالوا معايا ايديه فى أيديكم ونبقى بقلوبنا سوا مخلصيـــــــــــــن
تعالوا عشان مصر تفرح معانــــــــا دا مصر حزينة بقالها سنيـــــــــــــن
...
ضحك ليه علينا الشيطان يا حبايبــى وليه خلى ليل الحبايب طويـــــــــــل
وليه الشيطان خد ولادنا فى طريقـــه وطريق الشيطان فيه معاصى وويـل
وليه حط بزرة نزاع فى حياتنـــــــــا وليه الشيطان يبقى قدوه ودليــــــــــل
وليه ننسى كل المحبة اللى بينـــــــــا وبستان حياتنا اللى طارح جميـــــــل
وننسى الإخاء اللى جمع قلوبنـــــــــا وشعورنا اللى كان كل لحظة نبيـــــل
نسينا إن مصر بتنده علينــــــــــــــــا وبتنادى أحمد معاه ميخائيــــــــــــــل
تعالوا ننشف دموعها بأيدينا وبلاش تانى دمع عينيها يسيـــــــــــل
وهانموت بحسره إذا إحنا اتخاصمنا وهاتعيش سعيدة بلقانا الجميــــــــــــل